LOS MAZCARAOS EN  ROZAES  

Al falar de los mazcaraos en Rozaes (Villaviciosa) nun  ye la mio pretensión estremalos de los que huebiere por otros llugares, sinon dexar constancia de lo que yo conocí y de lo que buenamente me pudi enterar preguntando a otros mas vieyos que yo.

La tradición, de xuru bien antigua, mantúvose en Rozaes hasta la década de los ochenta (anque nun soi pa precisar l’añu, si m’alcuerdo de vistime de mazcaráu en 1986) . Ello quier dicir qu’anque durante los años de la dictadura taba prohibío mazcaritase, en Rozaes, siguió faciéndose y empatóse asina col “mal llamáu antroxu” actual, al que yo quiero más llamá-y “carnaval”, porque paezse más a los “bailes de mazcares” de les noveles qu’al antroxu que yo conocí.
 El final de los mazcaraos nesti pueblu, nun vieno de la mano de les prohibiciones, sinon de la “recuperación del carnaval” (al celebrase esti na Villa y notros puntos d’Asturies, nun yera fácil combinar el vistise de mazcaráu nel pueblu col dir de fiesta a otros sitios y acabamos por escoyer lo segundo).

Había dos díes de mazcaráos, ún palos ñeños y ñeñes, que yera’l domingu’l gordu y otru’l martes d’antroxu pa la xente mayor y neños grandes. Nin que dicir tien, que’l martes yera día  de trabayu y de escuela, asina que non toos podíen vistise.

Mazcaraos en Piñera, Rozaes (añu 1983 ó 1984)

LOS TRAXES

Los mazcaraos vistíense con ropa vieyo qu’habia peles cases (qu’antes tirabense menos coses qu’agora), pero, por contra que’l “carnaval”, nun pretendíen vistise de na concreto. Yera frecuente que se vistieren homes de muyeres y muyeres d´homes. Tamíen  podíen cubrir parte de la ropa con fueyes cosíes, xeneralmente de llorea (la llorea y el lloréu tienen fueya tol añu y son los árboles que usaben pa “poner el ramu” y tamién en dalgunes dances tradicionales). Nestos casos la ropa solía ser clara, y destacaba bien la fueya.

Los mazcaraos tapábense bien per tolos llaos pa que naide los conociere, porque los que los diben ver yeren los sos vecinos. Asina que nes manes llevaben  guantes y na tiesta  sombreru normal o picorniu (sobreru con forma cónica), y, pa tapar bien el pelo y el piscuezu, llevaben debaxo un pañuelu o media.

El picorniu, tamién llamáu tricorniu,  fue faciéndose menos frecuente colos años, y nos caberos ya casi nun lu poníen. Facíase de cartón forráu con papeles de colores y solía tar adornáu con cintes y flores, munches veces de papel. Dicen que primero lu facíen sobre una argadiellu de cañavera recubiertu y que yera meyor porque los mazcaraos, caminaben, saltaben y corríen munchu, y fechu d’esa manera nun se-yos estropiaba col sudor. Anque yo ya los conocí fechos de cartón ensin argadiellu.

Armazón d'un picorniu

Picorniu

            Si lo que llevaben yera sombreru, tamién diba adornáu con flores o cintes.

La cara diba cubierta con una careta que podía ser de pelleyu,  de cartón o de xénero. Les de pelleyu podíen llevar el pelo del animal. Dellos vieyos tamien s’alcuerden de ver una media afuracada o la cara pintada de negro con un corchu quemáu. Pero la xente que se vistía pelos años sesenta dicen que ya llevaben caretes compráes, aunque podía haber dalguna fecha por ellos.

Careta fecha de pelleyu y llana pal antroxu de 2017

 El calzao valía cualquiera que fuere cómodo, porque teníen que caminar y saltar.

Yera perimportante’l palu. Los mazcaraos llevaben palu. Dellos llevaben unos bonos tochos que-yos permitieran apoyase nellos pa saltar, y otros un palu tipu guiyada, pero  ensin pinchu.

Otru posible complementu yeren los lloqueros, qu’imponíen bastante. Cuando yo yera ñeña, dalgunos llevábenlos y otros non.

Mazcaraos con palos y lloqueros. 2016

LO QUE FACÍEN

Los mazcaraos diben peles cases del pueblu, incluso pelos pueblos vecinos, y dáben-yos fayueles, picatostes y sidra. Los de la parroquia Puelles solíen venir hasta Rozaes, y los de Rozaes diben a Puelles y a Niévares.

Col palu aprovechaben pa saltar, diben diendo “Uuuuuuu” y ruxendo los lloqueros, asina que imponíen abondo: sobremanera a los neños y neñes pasaben bien de mieu.

Los mazcaraos yeren además picardiosos: los vistíos de homes facién ademán de “meter mano” a les muyeres que tuvieren mirando.
video mazcaraos en Fabares 2016

RECUPERANDO LOS MAZCARAOS

Nel añu 2016 un grupu de xente animosa, respetuósa cola cultura del llugar y enfotada en recuperar les tradiciones, col sofitu de la Asociación de Vecinos de Rozaes y ¿como nón? coles vecines y vecinos de la parroquia volvieron dar allegría al pueblu, nesta ocasión nel domingu’l gordu: unos vistiéndose, otros preparando-yos fayueles y picatostes o convidándolos a sidre.
Recuperación de mazcaraos Rozaes

Mazcaraos na escuela. 2016

Nel 2017 otra vegada volvieron mazcaritase nel pueblu.

Mazcaraos en Fabares. 2017

Y como manera de dar a conocer esta tradición a otra xente que nun la llegó a conocer o face-yos alcordase de ella a los que la conocieren notros tiempos, nel 2017 animaronse tamién a allegase hasta “L’antroxu de La Villa”, pa desfilar ente carroces, charangues y disfraces. Pa munchos del públicu fue una novedá, pa otros, una prestosa alcordanza de los sos tiempos mozos o de lo que los sos mayores-yos cuntaben.. D' entós p'acá, los mazcaraos de Rozaes vienen participando nesi desfile, al que dende l'añu siguiente, 2018, se sumaron tamién los mazcaraos de Poreñu, 

Taller de caretes y Antroxu en La Villa AVV Rozaes

Dos mazcaraos preparaos pal Antroxu en La Villa
Dende 2016 los mazcaraos  de Rozaes visténse nel domingo'l gordu y van comiendo fayueles y picatostes pelos distintos pueblos de la parroquia, pero tamién se fueron conviertiendo en referente del antroxu rural tradicional y faciéndose ver per distintos conceyos d'Ansturies.
Mazcaraos delantre la escuela Rozaes (2018)
Mazcaraos Rozaes 2019
Dende va un par d'años, les escueles rurales y el colexu nel conceyu Villaviciosa entamaron estudiar tamién l'antroxu rural . Ta claro que  los mazcaraos tan calando fondo nel conceyu.