LOS  MOLINOS  DE  ROZAES 

    

 

Sabemos pol Catastro d'Ensenada que nel siglu XVIII había en Rozaes 10 molinos: cuatro na Güelga, que ye onde ñaz el ríu, ún na Vega, dos nos Molinos, ún en Barréu, ún n'Areñes y ún onde'l cementeriu y la antigua ilesia parroquial. Güei en día nun queden más que dos en funcionamientu.

^{Sección del MAPA DE “ Los molinos de Maliayo” de R.Balbín Loredo}

123- Molín d'Arriba- Na Güelga

124- Molín del Medio- Na Güelga

125- Nun conocemos el nome - Na Güelga

126- Molín d'Abaxu- Na Güelga

127- Molín na zona de La Vega

128- Molín del Mayorazu- Nos Molinos

129- Molín de Santiago- Nos Molinos

130- Molín del Barréu- Nel Barréu (Piñera)

131- Molín d'Areñes

132- Molín de la Ilesia- xunta la antigua ilesia parroquial y el cementeriu.

Hebio un tiempu nel que los molinos yeren un negociu interesante y los propietarios yeren la ilesia y les cases nobles y solariegues. Dempués fueron pasando a families más humildes. Había polo menos ún molín, na Güelga, que yera de vecería (tres vecinos turnabense pa trabayar).

Los de Rozaes yeren toos molinos fariñeros, d'una muela sola. Hacia los años 40 del sieglo pasáu, el Molín de Santiago dedicóse tamién a producir ellectricidá con una especie dinamo pa cargar bateríes pal allumbrao de les cases con bombilles, primero de que hubiere tendíu ellectricu. Traíenles y llevabenles en burros.

Güei en día queden dos molinos en Rozaes en funcionamientu, el molín de Santiago y el molín del mayorazu, ún al llau del otru, pero hasta la década de los 90 funcionó tamién el del molín del Barréu.

El molín del Barréu, ta na zona'l Barréu, a la vera'l riu, apegáu a una vivienda, debaxo'l barriu de Piñera. Pertenecia al obispáu y taba vinculáu a la casería de La Cuarta. Polos años 50 unos cuantos colonos de la ilesia compraron  les finques y caseríes que llevaben arrendáes. Encarnación la de La Cuarta compró la casería y el molín, que ya llevaba. Depués la so fíya, Berta, y el home,Pepe, ficieron la casa que ta agora amestada al molín. Años mas tardi vendiéron-yos la casa y el molín a Dosinda y José María. Dosinda fue la última moliñera activa de la parroquia, dexólo pelos años 90.

EL MOLÍN DEL BARRÉU

esquema del molín coles pieces y el so nome

^{Esquema del molín del Barréu, colos nomes de les pieces, sacáu d'un artículu de Lluis Portal na  revista  Cubera, pero col palabreru aumentáu}

Dos de los molinos de Rozaes pertenecieron a la casona de La Cueva. Después pasaron a otros propietarios y terminaron por abandonase, pero décades mas tarde fueron restauraos y son los dos qu'agora tan funcionando: el molín del Mayorazu y el molín de Santiago.

El molín del Mayorazu, como indica'l nome, yera del mayorazu (fiyu mayor) de la casona de La Cueva, depués vendióse  a Milio`l de Lala Sanzornín y mas tardi a Valo y Maruja. Maruja foi la última moliñera d`esti molín y la penúltima de Rozaes. Depués el molín tuvo cerráu y terminó hasta por caer el teyáu. Restaurólu`l so fiyu José Manuel Costales y dende entós p'acá mantienlu en perfectu usu.

 
 

 ^{Molín del Mayorazu}

El molín de Santiago, que tamién yera propiedá de la casa de La Cueva, depués vendióse y la última moliñera foi Vicenta la de Sanzornín que dexó de moler hacia los años 60. Polos años 90 taba fechu una llaceria. Mercáronlu Anxel y Tere, entamando la restauración hacia 1998.

 ^{Molín de Santiago en ruines.}

 ^{Semeyes del molín de Santiago restauráu.}

Anguaño estos molinos abren les sos puertes al públicu un día al añu, coincidiendo cola Feria  los Figos. El restu'l tiempu fáense llabores de mantenimientu y muelen pa casa.  

  

cartafueyos

Nel añu 2014, entamó facese en Rozaes una feria, "La feria de los figos". Dende esi añu los dos molinos que tan en bon usu, abren les sos puertes pa que la xente pueda velos moler. Nesti añu 2018 tuvo con nosotros Vicente Álvarez faciendo semeyes, que podéis ver nel so blog molineros y molinos
Nos primeros años los moliñeros ficimos un cartafueyu divulgativu relacionáu col molín. En toos ellos hai una parte que se repite, que ye la más específica de los molinos de la parroquia y dalgunes partes nueves. Los cartafueyos son los que vienen darréu.

2014

LOS MOLINOS DE ROZAES

Sábese que dende’l  siglu XVIII p’acá, hebio en Rozaes 10 molinos.  D’ellos 3 tan completos,  son el del Mayorazu y el de Santiago (nos Molinos) y el del  Barréu (en Piñera).

^{Sección del MAPA DE “ Los molinos de Maliayo” de R.Balbín Loredo}

^{123- Molín d’Arriba- Na Güelga}                                                                   

^{124- Molín del Medio- Na Güelga}                                                                                                                                                                

^{125- (…) Na Güelga}                                                                             

^{126- Molín d’Abaxu- Na Güelga}                                                      

^{127- (La Vega)}

^{128- Molín del Mayorazu- Nos Molinos. En funcionamientu. 
129- Molín de Santiago- Nos Molinos. En funcionamientu}      

^{130- Molín del Barréu- El Barréu (Piñera) En bon estáu 
131- Molín d’Areñes
132- Molín de la Ilesia – Xunta’l cementeriu}

ESQUEMA D’UN MOLÍN COLES SOS PIECES

    Esquema del Molín del Barréu de Piñera,  sacáu d’un artículu de Luis Portal  na revista Cubera. (palabreru aumentáu)

VENGO DE MOLER MORENA

Vengo de moler morena

De los molinos d’arriba.

Dormí cola molinera,

Olé, olé

Nun me cobró la maquila

Que vengo de moler morena.

Vengo de moler morena

De los molinos d’abaxu

Dormí cola molinera,

Olé, olé

Nun me cobró’l  so trabayu

Que vengo de moler; morena.

Vengo de moler morena

De los molinos del mediu.

Dormí cola molinera

Olé, olé

Nun me quedó más remediu

Que vengo de moler, morena.

Vengo de moler morena

De los molinos azules

Dormí cola molinera

Olé, olé

Sabado, domingo y lunes

Que vengo de moler; morena.

2015

                                        

LOS MOLINOS DE ROZAES

Dende’l siglu XVIII  p’acá hebio en Rozaes 10 molinos. Yeren toos molinos fariñeros: el molín d’Arriba, el del Medio, el d’Abaxu, otru molín na Güelga, el del Mayorazu, el de Santiago, el del Barréu, el d’Areñes y el de la Ilesia. D’ellos, los 4 primeros concentrábense en La Güelga (en menos d’un kilómetru dende’l nacimientu del ríu). Los meyor conservaos anguaño son el del Barréu, el del Mayorazu y el de Santiago (Los dos postreros son los restauraos  que tan en funcionamientu).

Cuenten los nuestros mayores, que les primeres bombilles d’allumbráu  nel pueblu funcionaben con ellectricidá almacenada en bateríes que se cargáben en molinos. En Rozaes el molín qu’usaba la energía del agua pa producir elléctrica yera’l  molín de Santigo. A él diben los vecinos de la parroquia pa que-yos cargaren les bateríes que llevaben pa so casa.

ESQUEMA D’UN MOLÍN COLES SOS PIECES

    Esquema del Molín del Barréu de Piñera,  sacáu d’un artículu de Luis Portal  na revista Cubera. (palabreru aumentáu)

PALLABRERU

La planta

MAÍZ-  cereal

MAIZU- planta del maíz

ESPIGU- parte alta de la planta

PANOYA- Espiga gorda con varies fileres de granos de maíz

TARUCU- La parte de dientro de la panoya

GATA- parásitu de los maízos que s’usa pa pescar

Tierres, productos y llabores

MAIZAL- tierra de maíz

MAIZÓN- maíz semao xunto pa cortalo verde.

ÑERBASU- caña seca del maíz

ESTARABACU- tucos de los maízos

CUCÓN- Pila de cuques de ñervasu

CUCA- gabielles de ñerbasu SALLAR- quitar les males plantes

ARRENDAR- arrimar tierra escontra la planta

SALLADOR- espantayu que ponen, nes tierres que nun fueron sallaes, el día la nueche de San Xuan

ESFOYAZA O ESBILLA – andecha pa preparar el maíz pal iviernu

RIESTRA- coleta fecha con panoyes pa colgales a secar nel horru.

ESFOYAR- quita-y parte de la fueya a les panoyes

ENRESTRAR- facer riestres

APURRIR- pasa-y les panoyes preparaes en grupos de dos o tres al enrestrador,

ESFREGAR- quitar los granos de la panoya

MOLÍN – conxuntu de mecanismos que formen la máquina de moler y tamién el edificio onde ta.

MAQUILA- parte de granu que cobra la molinera por moler y tamién el recipiente col que lo mide.

GALIPU- midía de capacidá que se corresponde con unos 4 kilos de maíz

COPÍN- midía de capacidá correspondiente a dos galipos (8 kilos)

FARIÑA- el maíz molío

HORRU y PANERA- edificios apoyaos en pegollos, onde se cuelguen les riestres de maíz.

BOROÑA- pan que se fae con fariña de maíz na forna o nel fornu.

TORTA O TORTU- especie de pan fecho con fariña de maíz o con mezcla de fariña de trigo, pero ensin formientu

                           REFRANES

Tienen maíz el mes de mayu, los molineros y dalgún ricayu.

Col agua del molín, la molinera engorda´l  gochín.

Pa la fuente y pal molín, nun s’espera pol vecín.

El que primero llega’l molín, primero muele.

A bon añu, y a mal añu, mio maíz quier  tar ralu.

Hasta la lluna d’abril nunca semes el maíz.

El maíz la cabera semana d’abril y la primera de mayu, la meyor sementera del añu.

Añu de tarrones, añu de boroñes.

Agostu secu, castañes al cestu, agostu moyáu, maíz pel teyáu.

Cuando  les ñueces  salen de cien en piña, xunce los gües y vete por fariña.

Maíz tubao granu aseguráu.

El maíz que non panoye per San Bartolomé, córtalo y échalo al güe.

Per San Isidru, el maíz nacíu.

Si llueve per Santa Ana, el maíz grana.

Cuando nun hay pan, bono ye torta.

Fariñes y sopes, lo mesmo dan munches que poques.

Empondérate boroña, que nun hai quien te coma.

Cancia’l cuquiellu, agua pal maíz.

El que de branu anda a truches y pel iviernu a paxarinos, nun tendrá munchu maíz qu’emprestar a los vecinos.

2016

EL  MAÍZ

Tienense noticies del maíz n’América dende fae 8000 años, pero pa que se conociere n’Asturies hubo qu’esperar hasta  dempués de la conquista d’esi continente. A finales del sieglu XVI nun testamentu d’un matrimoniu de Carreño, dexen a los sos herederos   «una fanega de maizo y otra de panizo».  Munchu más antigua yera la presencia de la escanda nesta tierra, ya que se sabe poles excavaciones de los castros de Camoca y de Moriyón que taba presente per estes tierres nos siglos VIII-VI antes de la nuesa era.

El maíz fue espardiéndose per Asturies a lo llargo del sieglu XVII. Nel sieglu XVIII Xovellanos dexa constancia nel so “Discursu pa promover la felicidá d’Asturies” diciendo qu’anque notru tiempu se cosechaba muncha   escanda, a finales del XVIII ya se cultivaba más maíz, yera la principal riqueza del campu asturianu y alimentaba a la mayoría de los sos pobladores. Tamién recuerda Xovellanos que “el pan hecho de ese fruto, que llaman 'borona' es el que come todo el pueblo rústico, y además  lo que llaman en algunas partes 'fariñes' y en otras 'farrapes'” y fala también de lo poco afayaíza que ye esta la tierra pa la sementera del trigo.

Pero’l trigo tenía más valor y yera más comida pa cases pudientes. Nel catastru d’Ensenada (s. XVIII) una fanega de trigo valía 22 riales, lo mesmo que la de fabes, una de maíz valía 12 y la de panizu y miyu valía 6 riales.

Podemos dicir que’l maíz mató munches fames, pero como  cosechaben poco y pagaben muncho d’impuestos , la dieta de les clases baxes acabó siendo casi solo de maíz  y apaeció una enfermedá desconocía primero, “la pelagra o mal de la rosa”,  que nun yera  por mor del maíz, sinon de la miseria que los facía alimentase sólo con ello.

PROPIEDADES DEL MAÍZ

• Tien  inositol, un nutriente paecíu a la vitamina B3 que facilita’l sueñu y ayuda a tresformar les grases.
• Ayuda a baxar el nivel de colesterol.
• Contien Betacaroteno, un antioxidante
• Ye rico en fibra, lo que lo fae recomendable para los problemes del intestín.
• Les barbes de les panoyes, son diurétiques.
• Ye un cereal recomendáu para persones con alerxa al gluten.
• Ye muncho enerxético. Ideal para deportistes y persones que faen muchu esfuerzu físicu, como neños y adolescentes.

 Molinos de Rozaes

Sábese qu’hebio na parroquia 10 molinos dende’l  s. XVIII p’acá:

- Molín d’Arriba- Na Güelga    

- Molín del Medio- Na Güelga

-(…) – Na Güelga

-Molín d’Abaxu- Na Güelga

- La Vega

- Molín del Mayorazu- Nos Molinos. En funcionamientu.

- Molín de Santiago- Nos Molinos. En funcionamientu                                                   

 -Molín del Barréu- El Barréu (Piñera) En bon estáu                                                                                                                          

-  Molín d’Areñes

- Molín de la Ilesia – Xunta’l cementeriu

ESQUEMA D’UN MOLÍN COLES SOS PIECES

 Molín de Barréu (Piñera) sacáu d'un artículu de Lluis Portal na revista Cubera

FARIÑES  O  FARRAPES

Nuna pota o cazu ponse a ferver agua con sal. Va echándose fariña de maíz pocu a pocu y revolviéndose pa que quede como una papilla espesa. Échase-yos azúcar, según el gustu de cada ún. Tamién se pueden cocinar con lleche.

COSADIELLES

Qué cosa tien el molín,

Precisa y non necesaria,

Nun puede moler sin ella

Y nun-y val pa nada.

                                                                       (el ruidu)

Arriba ta ñevando

Y abaxu ta lloviendo

                                                                         (el  molín)

Andar, andar

y tombu nunca degolar.

                                                                       (la muela’l molín)

2017

                De la tierra al horru. Del horru al molín.

Nos tiempos nos que la maquinaria agrícola casi nun existía, solía llabrase la tierra en febrero pa  voltiala. 

               LLABIEGU ROMANU O DE MADERA                           LLABIEGU DE FIERRO 

N’abril pasábase la gradia y, pa que los sos dientes de fierro calaran fondo y desficieran bien los tarrones, mangábense enriba della unes piedres. Depués desfacíense más tarrones cola fesoria.

                                GRADIES

Quedaba entos la tierra llista pa cuchar y semar.     Semábase a voleo  o a riegu y después arrastrábase la tierra pa tapar los maízos. Les sembradores vinieron más tardi.

                                  SEMBRADORES

N’ Asturies el maíz semabase asociao coles fabes. 

En naciendo’l maíz, cuando la planta tenía unos 10 centímetros d’alta, a principios de xunu, sallábase (removíase la tierra cola fesoria, quitábense les yerbes  y dalgún maízu, si taben demasiado xuntos).

Taba mal visto qu’esti trabayu nun tuviere fechu pa San Xuan. Les tierres que na nueche San Xuan nun tuvieran sallaes, apaecíen a otru día con un “sallador” (una especie de espantayu , pa facer rechifla)

Cuando les plantes taben más altes, hacia xunetu, arrendábase (allegábase-yos la tierra).

N´ochobre segábase’l maíz  (cortábense los maízos con focetes y facíense brazaos que se llamaben cuques y amontonábense faciendo con elles una pila que se llamaba cucón)                          

Cuando les panoyes taben seques, coyíense y llevábense a esfoyar. 

Nes esbilles esfoyábense les panoyes (quitábense-yos parte de les fueyes y dexábense los granos a la vista) y enrestábase (texíense les panoyes en riestres). 

La esfoyaza o esbilla  yera  una andecha na que colaboraben los vecinos. Unes veces tocaba facela en casa un vecín y otres en la d’otru.   Yeren los principales acontecimientos sociales  de la seronda. Mientres se trabayaba  cuntaben hestories, bromeaben o cantaben.  En acabando’l trabayu facíen xuegos y, na postrera esbilla de cada casa, combidábase con garulla (ñueces, castañes, sidre…)

Les riestres colgábense a secar nos horros y paneres , si teníen corredor n’él, si non nos gabitos.  Ya sólo quedaba esgranalo pa llévalo al molín a moler.

 HORRU CON GABITOS                        

ESGRANADORA

Xuegos d’esfoyaza

Nes esbilles o esfoyaces xugábase a l’alpargata ( había dos xuegos diferentes, un de pies y otru sentaos con fueyes nel mediu), a la plancha, al estripacuatro y al zurrón.

Xugando a l’alpargata nuna esbilla en Piñera

Molinos de Rozaes

Sábese qu’hebio na parroquia 10 molinos dende’l  s. XVIII p’acá:

- Molín d’Arriba- Na Güelga    

- Molín del Medio- Na Güelga

-(…) – Na Güelga

-Molín d’Abaxu- Na Güelga

- La Vega

- Molín del Mayorazu- Nos Molinos. En funcionamientu.

- Molín de Santiago- Nos Molinos. En funcionamientu                                                   

 -Molín del Barréu- El Barréu (Piñera) Completu                                                                                                                         

-  Molín d’Areñes  

- Molín de la Ilesia – Xunta’l cementerio